Ôpenzdrojowé programë pò kaszëbskù

Òpùblikòwóné w: Wkół kaszëbsczégò Linuksa — Michôł @ 2:50 pp 16 lëp. 2006 Dopòwiescë (0)

Pòmalë zrëszô dolmaczënk ôpenzdrojowich programów. Dzãka projektowi Rosetta je mòżno wespółrobic przë taczich dolmaczënkach. Narô robòtë je fùl przë dërżeniowëch aplikacëjach Ubuntu linuksa (GNOME ë KDE), chtërne jidze téż wëzwëskac do jinëch distribùcëji.

Dba je takô bë zrobic kaszëbską òperacjową systemã a nôlepi do tegò nadôwô sã Linux, ga letkò jidze gò zdolmaczëc. Nie òznôczô to, że brëkòwnicë jinëch systemów nie mdą miele taczich skaszëbionëch programów. Robòtë przë np. OpenOffice.org mdą téż wëzwëskòwóne do zrobieniégò Windowsowi wersëji ti programë, tak mdze téż przë czilë jinëch aplikacëjach (Firefox, Thunderbird, GIMP…).

Narô pòdspòdlim je Ubuntu, leno nick nie mdze procëm, bë skaszëbic téż jine distribùcëje, òsoblewie “live” (np. Knoppix). Jakô mùszi bëc takô distribùcëjô? W pierszi réze pùlt (desktop) a jegò dërżeniowi aplikacëje, czëlë to co widzy brëkòwnik, mùszą miec interfejs w kaszëbsczim jãzëkù. Nié mni wôżne je bë òd pierszégò zrëszeniô systemù móc pisac kaszëbsczé lëterë (terô nie je tak w niżódnym systemie). Drëdżim jãzëkã mùszi bëc pòlsczi, ga nen rozmieją wszëtcë Kaszëbi a nie jidze tak chùtkò wszësczégò zdolmaczëc (ë choba nigdë nie bãdze tak, żebë całi system béł skaszëbiony). A czej nie mdze pòlsczégò dolmaczënkù to (sztandardowò) òstanié tekst anielsczi.

W drëdżi réze chcemë miec jinë programë, chtërnë “gôdac” mdą do naji w najim jãzëkù. Tuwò dolmaczënk ju òbjimie biurowi ë domòcy aplikacëjë (openoffice.org, firefox, gimp, audacity, prosti grë ëtp.).

Në jo, równak przóde nót je zdolmaczëc nen dërżeń systemù a to je kąsk cãżkô robòta (dlôte, że je tegò wiele, sama robòta je letkô). Mést za sztërk (abò dwa, ale na gwës dopierze pò ferijach) mdzemë testowalë pierszą kaszëbską systemã!

Rôczã do pòmòcë!


Nen wpisënk òstôł dodóny w nie., 16, lëp., 2006 ò 2:50 pp ë nalôzł sã w dzélu Wkół kaszëbsczégò Linuksa. Mòżeta dozérac nen wpisënk dzãka pòwrózkòwi RSS 2.0. Mòżeta òstawic dopòwiesc , abò trackback ze swòji starnë.

Dodôj do załóżków

Felëją dopòwiescë »

Felëją narô dopòwiescë.

Pòwrózk RSS do tegò wpisënka. URL sygnalu TrackBack

Dodôj dopòwiesc