Zladowóną móm wersëjã Freespire 2.0 Alpha2U . Instalacëjô systemë pòszła mie pò prôwdze baro flot, na gwës chùtczi jakno Ubuntu, OpenSUSE, Fedora czë Debian. Nié mòże równak wëbrac n.p. pòlsczégò jãzëka przë instalacëji, co nie bëło dlô mie problemą, chòc trzëmóm to równak za minus zdrząc na to z perspektiwë dzysdniowëch czasów.
Pò pierszim zrëszëniém systemë witô naji KDE w wersëji 3.5.6, chòc je widzec felënk różnëch programów jaczé wëdôwają sã bëc mùszã, mëszlã tuwò òsoblëwié ò menadżerach paczétów, tuwò pòmôgô le instalacëjô tegò z kònsole. Jô wëbrôł dlô se Synaptica.

sudo apt-get install synaptic

Pò tim mòżemë ju na prosti ôrt dodac pòlsczi dolmaczënk dlô KDE bë dodstac systemã jakô bãdze dlô wikszoscë z naji zrozmiałô. (CNR nie mòże jesz brëkòwac, stądka nie wiem jak to z tim wëzdrzi.)

Cëż jesz…

Në jo, mómë zarô zainstalowóné pluginsë jakno n.p. flasha ë jinszé kòdeczi co je fejn zletczeniém dlô tëch brëkòwników co ju wiedno miele problemë z doinstalowaniém tich n.p. w Ubuntu czë Debianie.

Firefox ë Thunderbird są tuwò jakno Lmail ë Lbrowser, chòc króm tegò możemë dograc zwëczajno nie zmòdifikòwóné wersëje. Jiwer bëł ze zrëszeniém w wersëjach z Linshire (Lbrowser ë Lmail) jãzëkòwich lopków z Firefoxa czë Thunderbirda – nie dało sã, tuwò dô le lopczi z ti distribùcëji ë stądka móm je rëmniãté ë wgróné “zwëczajné” wersëje z Mozillë.

Mòże téż wëbrac kaszëbską klawiaturã (spòdlém je doch Ubuntu 7.04)

Aktualizacëjô online nie jidze tak flot jakno w Ubuntu, bò repòzytorëja (nimò tegò, że ne samé) są òdłożoné na serwerach Linspire – ne tipiczné dlô Ubuntu mòże gwës rãczno zmienic na serwerë Ubuntu bë przëspieszëc zaktualnianié.

Zmianë wprowadzoné przez Linspire w KDE prowadzą téż do tegò, że nie jesma w sztãdze je wedostac w 100% pò pòlskù – stądka mómë n.p. mieszané menu – szkòda.
Nimò tegò je Freespire czekawą mùltimediana wersëjã Linuksa ë robi dosc dobré wrażenié. Kąsk sã gwës jesz zmieni, bò testowónô wersëjô Freespire to Alpha.

Subiektiwno mëszlã, że eżlë chto chce miec mùltumedialną wersëjã Ubuntu bez mùszebnotë instacëji kòdeków, nen niech lepi zladëje LinuxMinta (to dô wersëjã z GNOME ë téż z KDE) ë bãdze z tegò barżi rôd.

• Freespire zladënk: http://wiki.freespire.org/index.php/Download_Freespire
• Linux Mint zladënk (mùltimedialnô alternatiwa): http://linuxmint.com/download.html

Instalacëjnô systema Click’n'Run (CNR) mô sã ùkôzac na swòji internetowi starnie CNR.com, jakô mô òstac zrëszonô na zôczątkù maja, ë bëc przistãpnô nié le blós dlô brëkòwników Linspire ë Freespire, le téż dlô jinszëch distribùcëjów. Brëkòwnicë Linspire ë Freespire mają dostac ju w czerwińcu mòżnotã ùżëwaniô ji dzãka ekstra pluginsowi, a òd westrzódka czerwińca téż brëkòwnicé Ubuntu, jakno ë pòzdze Debiana, OpenSuse ë Fedorë. Linspire ùprzistãpnił CNR darmôk ju łoni – dzãka ni mòże na prosti ôrt wëbrac wòlné ë téż płatné aplikacëje do ùżëwaniô na desktopie.

Freespire w wersëji 2.0 (jakô je ju w testowich wersëjach) mô sã ùkôzac na zôczątkù lëpińca ë mô bëc òpiartô na Ubuntu 7.04 w sparłączeniém z nônowszą wersëją KDE, CNR, bùtnowima czérownikama ë kòdekama, co mô zletczic brëkùnk systemë. Linspire 6.0, jakô je kòmercëjną wersëją Freespire 2.0, mô przińc sztërë tidzenié pò ni.