Kaszëbsczi Linux ë Ôpen Ùdbë : linuxcsb.org » Debian

Debian 5.0 “Lenny”

Mark — Sun, 15 Feb 2009 21:54:19 +0000

Debian GNU/Linux 5.0 bëł zapòwiadóny na wczora, wzérając równak na wnet dwa lata robòtë nad nowim wëdôwkã ti distribùcëji nie je to doch straszné spòzdnienié.

Lubòtnicë Debiana bãdą na gwës z niegò rad. Mómë do zladënkù distribùcëjã dlô wielu wszelejaczich architekturów, jakô zamëkô w se stabilny ë zaktualniony zestôwk softwôrë (jądro 2.6.26, X.org 7.3, Gnome 2.22). Z nowinów, jak na Debiana, mómë graficznegò instalownika, z jaczim mòże lżi winstalowac tã distribùcëjã, chòc ni mómë w nim wicy mòżnotów jakno w tribie tekstowim.

Standardowò instalëje sã nama graficzné òkrãżé Gnome, a pùlt òstôł w nim baro dopasowóny rozłożeniém menu na to co znómë z Ubuntu. Òkrãżé KDE zamkłé w Debianie “Lenny” to 3.5.10 (zamëkô w se kaszëbsczi jãzëk)- sparłãczoné je to z tim, że przed zamrożeniém softwôrë jaką zamëkô w se Debian, KDE 4 nie bëło dosc dla ni stabilné – mòże równak doinstalowac téż wersëjã 4.2.

Mùltimedialnota Debiana je terô ju przërónywalnô do Ubuntu, co téż je dobrą nowiną.

Debian GNU/Linux 5.0. “Lenny” je pierszim stabilnym wëdôwkã ti distribùcëji jaczi zamëkô w se standardowò kaszëbsczi jãzëk.

Zladowac systemã mòże ze starnów ùdbë: http://www.debian.org/distrib

Debian 5.0 “na żëwò”

Mark — Sun, 31 Aug 2008 09:49:25 +0000

Karno Debian Live wëdało pierszą beta wersëjã zestôwkù live obrôzów nowégò Debiana GNU/Linux 5.0 “Lenny”, jaczi zamëkô w se òbrôzë dlô CD/DVD, USB-Stick, Tarballs (dlô PXE Netboot) ë òbrôz Squashfs (dôwający mòżnotã zrëszeniô sytemë live prosto z internetu, abò môlowi sécë). Je to pierszi rôz jak mòże òficjalno dobëc “czëstegò” Debiana w wersëji live, bez mùszebnotë instalacëji systemë na cwiardi disk.

Òbrôzë nowégò Debiana 5.0 mòże dobëc dlô trzech graficznëch òkrãżów: Gnome, KDE ë XFCE ë jak narô dlô architekturë procesorów: i386 ë amd64. Drëgô wersëjô beta (jakô pòkôże sã za sztërk) mô zamëkac téż ju w se wspiarcé dlô PowerPC ë Sparc, jakno ë instalownika live, jaczi mô dac mòżnotã instalacëji systemë na cwiardi disk.

Starna ùdbë: Debian-live
Zladënk òbrôzów wersëji Beta 1: Lenny live beta1

Roczëzna Debiana

Mark — Tue, 19 Aug 2008 07:03:28 +0000

To ju je 15 lat, jak 16. zélnika 1993 Ian Murdock wësztartowôł ùdbã Debian. Jegò zgrôwą bëło ùsôdzenié linuksowi distribùcëji jakô bë le wòlną softwôrã w se zamëka ë nad jaka kòżdi robic bë móg. W midzëczasu robi nad Debian GNU/Linuksã kòl 2000 dobrowólnëch rozwijôrzów, a samô distribùcëjô dożda sã miona mòcny ë sztabilny systemë, jakô je téż spòdlã dlô wielu jinszëch distribùcëjów jakno n.p. Ubuntu czë Knoppix. Nônowszô wersëjô Debiana 5.0 (“Lenny”) pòkôże sã nama na zôczątkù séwnika.

Kaszëbsczi jãzëk w Debianie z KDE

Mark — Sat, 10 May 2008 17:21:03 +0000

Mómë dlô waji dodóny artikel ò tim jak nastôwic kaszëbsczi jãzëk w Debianie Lenny z òkrãżã KDE.

Je to nôslédny przëmiôr na to, że naju robòta przë KDE je widzałô w corôz wicy distribùcëjów, a nié le blós w Kubuntu – co mòże pòmëszlëc czëtając wpisënczi na najich starnach .

Dzél pòmòcë do Linuksa bãdzemë pòmalińkù dofùlowiwac przidatnëma artiklama ë to nié le blós ò kaszëbsczich wersëjach. Jeżlë môta pëtania, czë téż pòmëslënczi na przëdatné artikle, to proszëmë te sélac do naju ze starnë łaczbë.

Czëtôjta: Kaszëbsczi jãzëk w Debian Lenny

Kaszëbsczi jãzëk w Debian Lenny

Mark — Sat, 10 May 2008 16:53:05 +0000

Dzysô zajmiemë sã instalacëją kaszëbsczi jãzëkòwi wersëji KDE w Debianie. Je òna ju przistãpnô w wëdôwkù Lenny jaczi mô sã szatbilny pòkôżac kòl kùnca rokù (chòc przë Debainie mòżemë rëchòwac z tim, że to dô czile tidzeniów spòzdzeniô).

Testowô wersëjô Debiana je pòdle naju ju na tëli sztabilnô, że mòże jã zwëczajno brëkòwac, nimò tegò mùszimë dac òstrzegã, że jeżlë ji bãdzeta ùżëwac, to brëkùjeta ji na swòją òdpòwiedzalnotã.

1. Zladënk òbrôzów ISO

Òbrôzë ISO Debiana Lenny mòżemë zladowac ze starnów http://www.debian.org/devel/debian-installer/
Do wëbiérkù mómë baro wiele wspierónëch systemów, jakno ë wszelejaczich ôrtów instalacjowichmediów. Ma, dzãka chùtczémù przëstãpie do nétë wëbrôlë wersëjã netinst.

2. Instalacëjô KDE

Debian instalëjë nama z dodomù òkrãżé GNOME ë bez to bë dostac KDE (tuwò w wersëji 3.5.9) je nót, pò wësztartowaniô systemë z CD/DVD, do òptacëji bòtowaniô dopisac blós:

    install desktop=kde

Pò tim ju winstalëjë sã nama Debian z òkrãżã KDE. Przë instalacëji pòkôże sã wama pòle wëbierkù òptacëjnëch przëdôwków – tuwò wëbierzta fùljãzëkòwé wspiarcé kde-i18n.

3. Instalacëjô kaszëbsczich lopków z pòmòcą KPackage

Pò zakùńczony instalacëji môta Debiana w wëbróny przë ni jãzëkòwi wersëji.

3.1 Bë dodac kaszëbsczi jãzëk jakno domëszlny dlô systemë je nót zrëszëc programã KPackage. Przë pòlsczi wërsëji Deniana biéjta w Kde-menu do System ë tam wëbierzta KPackage

3.2 W KPackage biéjta do załóżczi Wszystkie ë wpiszta w pòlu szëbkbë csb
W skùtkù szëbkë wëskòknie wama kde-i18n-csb, co je szëkóna kaszëbską wersëją. (Mòżeta téż szrkac prosto za kde-i18-n-csb)

3.3 Klëknijta z lëwi starnë na kde-i18n-csb, a pò tim wcësnijta na spódkù knąpã Zainstaluj

3.4 Systema spitô sã waji ò parolã dlô brëkòwnika root – wpisztã jã (môtã jã pòdóną przë instalacëji systemë)

3.5 Pò pòmëszlnym wlogòwaniô wëskòknie wama òkno instalacëji, dze wcësnijta Zainstaluj

Terô na ekranie òbôczëta proces instalacëji kaszëbsczich lopków

3.6 Pò skùńczony instalacëji wcësnijta knąpã Gotowe ë wińdzta z programë

Kaszëbsczé lopczi môta ju terô w systemie ë je je le nót aktiwòwac

4. Wëbiérk kaszëbsczégò jãzëka dlô systemë

4.1 Wëbierzta w KDE-menu do Centrum sterowania.

4.2 Tam wëbierzta w menu Regionalne i dostepność pòdmenu Kraj/region i język.

4.3 Z prawi starnë wëbierzta w Dodaj język i tam w inne wëbierzta Kaszubski.

4.4 Kaszëbsczi wskòknął wama w pòlu brëkòwónëch jãzëków. Terô wcësnijta na spódkù knapã Zastosuj.

4.5 Systema zaktualni wama terô kònfigùracëjã. Pò tim zamknijta Centrum kontroli.

4.6 Terô le je nót zrësztartowac kòmpùtr.
Òptacëjno mòżeta zrësztartowac blós serwerã X wcëskając na raz kòmbinacëjã knapów Ctrl+Alt+Backspace.

Pò wlogòwaniô do systemë môta terô ju Debiana w kaszëbsczim jãzëkù. Je to generalno, w procëmnoce do Kubnutu, “czësté” KDE blós z dodôwkã kataloga Debian.

Z nôdzeją, że ten artikel stôł sã wama pòmòcny żëczëmë wama wiele szpôsu przë brëkùnkù kaszëbsczi wersëji KDE w Debianie.

Czëtôjta téż: Kaszëbskô klawiatura w KDE 3.5.x

Kaszëbskô klawiatura w GNOME

Mark — Wed, 02 Apr 2008 18:03:41 +0000

Bëło ju ò tim jak je nót ùstôwic kaszëbską ë pòlską klawiaturã w KDE, në to terô przëszedł ju czas na to, bë Wama pòkôzac ja letkò mòże to zrobic w GNOME. Òstônã tuwò, jak ju rëchli, przë Debianie 4.0 (w Ubuntu je to ju mòżlëwé w wersëji 7.04). Proszã równak nie zabiwac ò tim, że kaszëbskô klawiatura nie je jesz bënë wszëtczich distribùcëjów, chòc tëch je ju corôz wicy.

1. Klëkni prawą knapą mëszë na górny lëstwie ë wëbierzë “Dodaj do panelu“.

2. Terô z lëstë wëbierzë “Wskaźnik klawiatury” ë wcësni na knąpã “Dodaj“, pò czëm zamkni to òkno.

3. Ù górë w lëstwie mómë ju terô òznaczenié “Pol“, na jaczé je terô nót znôwù najachac mëszą ë wcëskając prawą knąpã wëbrac “Otwórz ustawienia klawiatury“.

4. Tuwò biéj do załóżczi “Układy” ë wcësni tuwò knąpã “Dodaj“.

5. Terô z lëstë wëbierzë dzél “Poland” a tuwò naznaczë “Kashubian” ë wcësni na knapã “OK“.

6. Môsz terô ju pòlską ë kaszëbska klawiaturã kòl se. Ta ù górë je wiedno ną domëszlną dlô systemë.

7. Klëkając mëszą na òznaczenié “Pol” dostôniesz rôz kaszëbską, a rôz pòlska klawiaturã. (Króm tegò mòże téż to robic prosto z klawiaturë.)

Na nen sam ôrt mòżeta dodôwac téż jinszé jãzëczi jaczich brëkùjeta na kòmpùtrach.

Debian GNU/Linux 4.0 (Etch) òpùblikòwóny

Mark — Mon, 09 Apr 2007 09:10:12 +0000

Karno Debiana pòdało òficjalną wëdowiédzã ò wëdaniô kùncowi wersëji Debian GNU/Linux 4.0 – kòdowé miono Etch. Òd slédny wersëji 3.1 przeszło ju 22 ksãżëców, planowò mia sã Etch pòkôzac ju w gòdnikù łońsczegò rokù, le bez za wiôlgą lëczbã kriticznëch felów, jaką jesz w tim czasu szło bënë nalezc, przesëniãto ji wëdôwk na pózdze.

Nowô wersëjô mòże zrëszëc na 11 wszelejaczich kòmpùtrowich architekturach, zamëkô w se mòżnotã wëbiérkù z 18 000 paczétów soft-wôrë, z czegò je 6 500 nowich a 2/3 zaktualnionëch – w przërówaniô do Sarge. Jądro òpiarté je na wersëji 2.6.18, a X.org nachôdô sã bënë jakno 7.1, OpenOffice.org w wersëji 2.0.4a. Jakno graficzné òkrãżé stoją do wëbiérkù m.jin. GNOME 2.14, KDE 3.5.5a ë Xfce 4.4. Spòdlém soft-wôrowich archiwów są: glibc 2.3.6 ë GCC 4.1.

Zladowac Debiana GNU/Linux 4.0 mòże z ftp-mirrowów, zamòdlëwô sã równak brëkòwanié Bittorrenta.

Kaszëbskô klawiatura w Debianie 4.0 z GNOME

Mark — Sun, 11 Feb 2007 19:24:11 +0000

Móm ë ju wama pisóné ò tim jak ùstôwic kaszëbską ë pòlską klawiaturã w KDE, në to terô przëszedł ju czas na to, bë Wama pòkôzac ja letkò mòże to zrobic w GNOME. Òstónã tuwò, jak ju rëchli, przë Debianie 4.0 (w Ubuntu je to ju mòżlëwé w wersëji 7.04). Proszã równak nie zabiwac ò tim, że kaszëbskô klawiatura nie je jesz bënë wszëtczich distribùcëjów, chòc tëch je ju corôz wicy.

Pòmòc ò ùstôwie klawiaturë w GNOME mómë wama ùprzistãpnioną w dzélu Kaszëbsczi Linuks, w artiklu:

Kaszëbskô klawiatura w GNOME

Kaszëbskô klawiatura w Debianie 4.0 z KDE

Mark — Fri, 02 Feb 2007 22:23:23 +0000

Corôz wicy nowich distribùcëjów zamëkô ju w se z dodomù kaszëbską klawiaturã (OpenSUSE 10.2, KNOPPIX 5.11…). Në to ë przëszed ju chòba czas na to bë wama pòmóc w ji dodaniô do pòlsczégò ùstôwù. Bënë ju òna je, le trza jã aktiwòwac, a że òbrôz gôdô wicy jakno słowa, to ë na pòmòc òsta òpiartô w 90% na òbrôzkach.

Articzel na przëmiôrze Linuksa Debian 4.0 (etch) z graficznëm òkrãżém KDE (przëmiôr z GNOME przińdze za sztót) mómë wama ùprzistãpniony w dzélu Kaszëbsczi Linuks, w artiklu:

Kaszëbskô klawiatura w KDE 3.5.x

A kùńcowi efekt ùstôwù mòżeta òbôczëc niżi na òbrôzkù