Kaszëbsczi Linux ë Ôpen Ùdbë : linuxcsb.org » Wkół kaszëbsczégò Linuksa

Ubuntu/Kubuntu 10.04 LTS

Mark — Sun, 16 May 2010 20:17:50 +0000

Ubuntu 10.04 LTS “Lucid Lynx” òstało ùprzistãpnioné dwie niedzele nazôd. Bënë mómë, w przërównaniu do wczasniészi wersëji, wiele zjinaków w graficznycm wëzdrzatkù, krótszi start systemë ë m.jin. nowé ònlain ùsłëżnotë. Całownô zamkłô w tich distribùcëjach softwôra je naturalno przëstãpnô w nônowszich swòjich wersëjach. Ubuntu 10.04 LTS je wersëją z dołgòterminowim wspiarcém, piąc lat dlô serwerów ë trzë dlô biurkòwich („zwëczajncyh”) wersëjów. Mòżelëwô je aktualizacëjô z wersji 8.04 LTS ë 9.10 .

Kubuntu 10.04 LTS je pierszą wersëją z dołgòterminowim wspiarcém, chtërnô zamëkô w se KDE 4 – tã wersëja KDE je téż zdolmaczonô na kaszëbsczi ë przez to Kubuntu mòże dali nastôwic na kaszëbsczi jãzëk, jak to ju bëło w slédnych latach.
Jeżlë sygnie nama czasu, to bãdzemë mielë starã ò to, żebë ùprzëstãpnic wama tuwò téż kaszëbskòjãzëkòwò zrëchtowóny òbrôz ISO, chtëren bãdze szło wëpôlëc na platczi CD czë DVD.

Nowé wersëje mòże zladowac ze starnów:

Ubuntu: ubuntu.com/getubuntu/download
Kubuntu: kubuntu.org/getkubuntu

Kaszëbsczi Linux w Radio Gduńsk

Mark — Sun, 28 Feb 2010 20:07:25 +0000

Chcemë òdnotowac gòscënã, jednegò z wespółrobòtników starnów linuxcsb.org, Michała Òstrowsczégò w Radio Gduńsk, dze mógł òn 21 gromicznika kąsk przëblëżëc słëchińcom aùdicëji Na bôtach ë w bòrach, nają robòtã nad dolmaczënkã dzélów Linuksa na kaszëbsczi, ò jaczi wama na tich starnach piszemë.
Aùdicëjã mòże òdsłëchac w archiwùm gduńsczégò radia – téma dolmaczënkù nachôdô sã kòl kùńca.

Chcemë sprostowac przë ti leżnoscë wëdowiédzã ò naszich starnach – ne są w sécë òd 2006 rokù, a ni “2 lata” jakno mòże to ùczëc w aùdicëji. Jesma rad z tegò, że na téma, chòc gwës w przërówaniu do wszelejaczich sztridów mało medialnô, nalazła sã w Radio Gduńsk.

* Logò Radia Gduńsk pòchôdô ze starnów radio.gdansk.pl ë to òne są jegò miéwcą

Kaszëbsczi Remix Kubuntu 9.10

Mark — Tue, 12 Jan 2010 15:17:10 +0000

Mómë przërëchtowóną dlô waji do zladënkù platkã CD Kaszëbsczi Remix Kubuntu 9.10 (csb-lite), dofùlowóną kaszëbsczim jãzëkã ë kąsk zmòdifikòwóną, pierszã òperacjową systemã Linux pò kaszëbskù – òpiartą w 100% na distribùcëji Kubuntu 9.10. Je to platka chtërną mòże zladowac z najich starnów ë jaką mòże pòzdze brëkòwac abò prosto z CD, abò téż jã zwëczajno winstalowac. Zamòdlëwómë, dlô nowich brëkòwników Linuksa, abë wëpróbòwôlë jã wprzód prosto z CD – bez instalacëji.

Òbrôz ISO platczi (680 MB) mòże zladowac z negò placu:

Kaszëbsczi Remix Kubuntu 9.10 (csb-lite)
i386 (x86, 32-bitowi, na wersëjô robi równak téż na 64-bitowich kòmpùtrach)

Przëdatnô wama mòże òkôzac sã pòmòc w ùsôdzeniô sztartowi platczi CD pòd Windowsã ze zladowónegò lopka, czëtôjtã proszã ò tim na naji starnie: Zrechtowanié sztartowi platczi cd/dvd pod windowsa

Jakno zrëszëc Kaszëbsczi Remix Kubuntu 9.10 ju pò wëpôleniu platczi?

Włóżta zwëczajano platkã do wajegò nëkù CD ë zrëszta kòmpùtr z niã bënë. Pò wëskrzënieniu sã sztartowégò menu klëknijta na knąpã Enter abë zrëszëc systema blós z CD – bez instalacëji. Jeżlë sã to wama nie darzëło, to je nót wama zmienic sztartową pòsobnicã w BIOS kòmpùtra.

**Czim je Kaszëbsczi Remix Kubuntu 9.10?**

Nie je òn tak pò prôwdze niczim jinszim jakno kąsk zmòdifikòwóną wersëjã Kubuntu 9.10 dofùlowóną ò kaszëbsczi ë pòlsczi jãzëk. Ne dwa jãzëczi dôwają nama mòżnotã przëstãpù téż do bòkadny softwôrë w pòlsczim jãzëkù, chtërnô jesz nie je zdolmaczonô na kaszëbsczi. Bëło to dlô naji wôżné, bò dzãka temù nié mómë ògrańczeniô w dofùlowaniu systemë zrozmiałima dlô brëkòwników programama.

**Jaczé wspiarcé mô Kaszëbsczi Remix Kubuntu 9.10?**

Taczé sómé jakno kòżdô jinszô wersëjô Kubuntu – prosto z serwerów ùdbów familëji Ubuntu, dze téż nachôdô sã m.jin. naji dolmaczënk.

**Je Kaszëbsczi Remix Kubuntu 9.10 nową distribùcëją?**

Nié, nie je.

To le zestôwk aplikacëjów ë nastôwów jaczé kòżdi mòże téż sómemù ù se w Kubuntu ùsôdzëc.
Ùsôdzony òstôł òn do tegò, abë zlëtczic nowim brëkòwnikòm Linuksa prawie ne nastôwë.

Jak to je w nim z pisaniém pò pòlskù?

Mómë aùtomatno dodóné dwa ùstôwë klawiatrë: kaszëbsczi ë pòlsczi. Klëknijta zwëczajno na pòlską fanã z nôdpisã “csb” abë zmienic ùstôw na pòlsczi ë znôwù nazôd abë dobëc kaszëbsczi.

Jak to je z tim kaszëbscizm dolmaczënkã?

Mómë starã òd 4 lat ò to abë naji dolmaczënk bëł jak nôlepszi, jesma równak le lëdzama, a lëdze robia fele, stądka proszimë ò zrozmienié dlô przez waji dozdrzónych zmiłków.
Kaszëbsczi Remix Kubuntu 9.10 zamëkô w se w przédnym dzélu naji całowny dolmaczënk òkrãżô KDE ë je dofùlowóny baro malińczim dzélã przëstãpnegò w kaszëbsczim najegò dolmaczënka Ubuntu.

Gdze dobëc pòmòcë w sécë?

Pòmòcné artikle dobëjeta m.jin.:

na pòlskòjãzëkòwich starnach: ubuntu.pl
anielskòjãzëkòwich starnach kubuntu.org

Żëczëmë wiele szpôsu w testowaniu!!!

Mark Kwidzińsczi ë Michôł Òstrowsczi

Linux Mint 8 (skaszëbiony)

Mark — Sun, 06 Dec 2009 15:15:10 +0000

Linux Mint 8 (kòdowé miono: Helena) , distribùcëjô zbùdowónô na nowim Ubuntu 9.10 (Karmic Koala) , òsta wëdónô w slédnym tidzeniu. Zamkłé w Ubuntu dzéle systemë są téż zamkłé w nowim Mince, ë tak mómë w nim jądro 2.6.31, Gnome 2.28 ë Xorg 7.4, startową programã Grub2, a sztandardową systemã lopków je téż Ext4.

Jinaczi jakno Ubuntu ë wielu jinszëch linuksowich distribùcëjach, w Linux Mint mómë ju z dodomù winstalowóné nôwôżniészé mùltimedialné kòdeczi, tak że mòże zarô pò instalacëji zrëszac lopczi MP3, grac platë DVD czë òbzérac filmë na YouTube.

Kaszëbsczé menu Linux Mint 8

Linux Mint 8 - skaszëbiony

Linux Mint przënôszi ze sobą swòjé menu, chtërné ju terô, dzãka naji przë nim robòce, je téż przëstãpné w kaszëbsczim jãzëkù – to samò tikô sã tipicznych blós dlô Linux Minta aplikacëjów. Na nen ôrt, chòc dolmaczëc, dolmaczimë wicy przë KDE, dostôwô z Linux Mintã brëkòwnik wersëjã òperacjowi systemë Linux òpiarti na GNOME, chtërnô ju z pòzdrzatkù bëtnoscë kaszëbsczégò jãzëka mòże ju dac mù zadowòlenié.

Prostota instalacëji, winstalowóné kòdeczi ë kaszëbsczi jãzëk wëdôwają sã gôdac do kaszëbsczich lubòtników GNOME za ną distribùcëjã. Z czasã bãdze gwës téż wicy przëstspnych kaszëbskòjãzëkòwich aplikacëjów – chãtni do wespółrobòtë są do ni rôczony!!

Zladowac Linux Minta mòże ze starnów: linuxmint.com

Linuksowô wëdôwkòwô jeséń

Mark — Sun, 29 Nov 2009 21:56:38 +0000

Òd jaczégòs ju czasu dostôwómë dwa razë w rokù nowé wëdôwczi zaktualnionych linuksowich distribùcëjów. Tak pò prôwdze to nié wszëtczich, równak czile z tich wikszich robi to regùlarno.

Tak bëło téż w tã jeséń – w slédnych tidzéniach pòkôzałë sã distribùcëje:

Ubuntu 9.10
ë kòl ni té:
- Kubuntu 9.10
- ë Xubuntu 9.10
openSUSE 11.2
Fedora 12

Kòżdô z nich niese ze sobą zaktualnioną softwôrã, nowé jądra Linuksa ë generalno to mniszé czë wikszé zmianë na lepszé ë to tak, że tak pò prôwdzë to kòżdi mòże nalezc, westrzód nich, pasowną distribùcëjã dlô se. Instalacëjô kòżdi z wëżi namieniónych je zblëżono letkô ë nawetka ti, co nié mają zebrónegò wiôldżegò doswiadczeniô w ni, bãdą w sztãdze sã z nią pòradzëc.

Instalownik Firefoksa w Kubuntu 9.10

Przez to, że dolmaczimë na kaszëbsczi KDE ë tipiczné distribùcjowé dzéle prosto przë Kubuntu chcemë le zamòdlëc tã distribùcëjã dlô tich, co chcą nastôwic w Linukse kaszëbsczi jãżëk, bë ji prawie brëkòwôlë, przez to że je òna nôbarzi skaszëbionô.

Òstôwając przë Kubuntu, to nie wiémë jak wama, le nama wiédno gwës felowało to, że pò instalacëji nie dało bënë zarô przezérnika Firefox. Terô téż gò jesz nie dô chòc je ju lżi gò doinstalowac, a to dzãka môłi aplikacëji (téż pò kaszëbskù) jaką mòże nalezc w internetowim dzélu menu KDE.

Ubuntu 9.04 ju je

Mark — Fri, 24 Apr 2009 00:43:42 +0000

Pùnktualno z terminã realizacëji pòkôza sã nowô wersëjô 9.04 (Jaunty Jackalope) pòpùlarny linuksowi distribùcëji Ubuntu. Do zladënkù stoją òbrôzë CD/DVD dlô desktopów ë serwerów z 32 ë 64 bitowima procesorama z architekturą x-86, jakno ë wersëjô Ubuntu 9.04 Netbook Remix na pamiãc USB dlô Netbooków.

Bënë nowégò wëdôwkù mómë m.jin. : nowé jądro (2.6.28.11), X-Server w nowim wëdôwkù 1.6.0, zaktualnioną softwôrã.

Ubuntu zamëkôw se graficzné òkrãżé GNOME 2.26.1, a Kubuntu KDE 4.2.2. Przë tim slédnym wôrt je dodac, że mómë w nim kaszëbską wersëjã KDE jakô je lepszegò kwalitetu jakno rëchliszé wëdôwczi. Króm tegò mają rozwijôrze Ubuntu dorobioné startowanié systemë tak, że skrodzëł sã nama czas startowaniô ò kòl 30%. Familëjô Ubuntu wspiérô téż terô nową systemã lopków Ext4, chtërnô stoi do wëbiérkù króm standardowi jesz u Ubuntu Ext3.

Òbrôzë platków mòże zladowac darmôk z:

Kubuntu: http://www.kubuntu.org/getkubuntu
Ubuntu: http://www.ubuntu.com/getubuntu/

abò téż zamówic darmôk CD z negò placu:

Kubuntu: https://shipit.kubuntu.org/
Ubuntu: https://shipit.ubuntu.com/

Debian 5.0 “Lenny”

Mark — Sun, 15 Feb 2009 21:54:19 +0000

Debian GNU/Linux 5.0 bëł zapòwiadóny na wczora, wzérając równak na wnet dwa lata robòtë nad nowim wëdôwkã ti distribùcëji nie je to doch straszné spòzdnienié.

Lubòtnicë Debiana bãdą na gwës z niegò rad. Mómë do zladënkù distribùcëjã dlô wielu wszelejaczich architekturów, jakô zamëkô w se stabilny ë zaktualniony zestôwk softwôrë (jądro 2.6.26, X.org 7.3, Gnome 2.22). Z nowinów, jak na Debiana, mómë graficznegò instalownika, z jaczim mòże lżi winstalowac tã distribùcëjã, chòc ni mómë w nim wicy mòżnotów jakno w tribie tekstowim.

Standardowò instalëje sã nama graficzné òkrãżé Gnome, a pùlt òstôł w nim baro dopasowóny rozłożeniém menu na to co znómë z Ubuntu. Òkrãżé KDE zamkłé w Debianie “Lenny” to 3.5.10 (zamëkô w se kaszëbsczi jãzëk)- sparłãczoné je to z tim, że przed zamrożeniém softwôrë jaką zamëkô w se Debian, KDE 4 nie bëło dosc dla ni stabilné – mòże równak doinstalowac téż wersëjã 4.2.

Mùltimedialnota Debiana je terô ju przërónywalnô do Ubuntu, co téż je dobrą nowiną.

Debian GNU/Linux 5.0. “Lenny” je pierszim stabilnym wëdôwkã ti distribùcëji jaczi zamëkô w se standardowò kaszëbsczi jãzëk.

Zladowac systemã mòże ze starnów ùdbë: http://www.debian.org/distrib

KDE 4.2 “Answer”

Mark — Wed, 28 Jan 2009 22:56:46 +0000

Karno KDE wëdało 27 stëcznika nową wersëjã wòlnegò graficznegò òkrãżô KDE 4.2 ò kòdowim mionie “Answer” (csb.:Òdpòwiesc”).

Nowô wersëjô, króm zaktualnieniów ë pòprôwków, òsta ju tak rozbùdowônô bë bëła atrakcjowô dlô wnet wszëtczich brëkòwników, co jesz ò rëchliszi wersëji nie szło do kùńca rzec. Szerszé wiadło ò nowinach w KDE 4.2 mòże przeczëtac na starnch ùdbë, m.jin. w pòlsczim jãzëkù na starnie kde.org.pl.

Dzãka naji robòce nad dolmaczënkama, kaszëbskô wersëjô je dali przëstãpnô w sztabilnym òficlanëm wëdôwkù – mómë nôdzejã, że mô òna nalazłé ë gwës téż nalezé swòjcih brëkòwników.

Kubuntu 8.10 Intrepid Ibex

Mark — Sun, 09 Nov 2008 12:18:51 +0000

Ubuntu/Kubuntu/Xubuntu to trzë wersëje z różnëma graficznëma òkrãżama, jaczé òstałë slédno òpùblikòwóné w swòji nowi wersëji 8.10. Nôwikszé widzawné zjinaczi mòże òbaczëc w wëdôwkù z KDE (Kubuntu), dze ju sztandardowò mómë wersëjã pùltu 4.x tegò òkrãzô – na tim téż są tuwò skòncentrëjemë.

Nowé òkrãżé KDE 4.1.2 niese ze sobą, w przërównaniu do 3.5.9, wiele zmianów. W dzélu równak mómë part znónëch nama rëchli fùnkcëjów, jaczé jesz nie są przistãpny w KDE 4.1 – brëkòwnicë co nie chcą tich starcëc, niech òstaną narô jesz przë KDE 3.5.x ë z Kubuntu 8.04 Hardy Heron, nen wëdôwk je dali wspiéróny. Proszëmë przeczëtac na starnach kde.org articzel “Is KDE 4.1 for you?” (“Je KDE 4.1. dlô ce?”) bë sã ùgwësnic, czë ju je wôrt wama przeńc na nowé òkrãżé. Pòmòc w migracëji z KDE 3 na KDE 4 nalezeta na starnach wiki.kubuntu.org .

Pùlt

Sztandardowò w Kubuntu 8.10 niese ze sobą pùlt Plasma – to dopasowóny zestôwk wszelejaczich widżetów z dofùlowaniama, jacze dôwają mòżnotã dobregò dopasowaniô do se KDE 4. Tak na przëmiôr QuickAccess Plasmoid w panelu dôwô mòżnotã prostegò dońdzeniô do lopków w domôcëm katalogù. Efektë pùltu KWin są sztandardowò aktiwòwóné ë tak mómë m.jin. ceniowanié ë przezérnotã òknów – te równak mòże òbôczec blós jeãlë graficznô kòrta to ùmòżlëwiô, jinaczi nie są òne aktiwòwóné.

Nôrzãdza

Z nôrządów mómë menadżera lopków Dolphin, jaczi òstôł w KDE 4 dali pòprôwionym ë przez co mómë ju baro mòcné nôrzãdze sprôwianiô bënë – mòże rówank dali brëkòwac do tegò Konquerora. Do sprôwioaniô paczetama softwôrë je w nowim KDE Adept, z dopasowanym do ni wëzdrzatkã, w nowi wersëji 3.0, jakô je barżi sztabilnô ë téż mni brëkùjącô dostónków do robòtë.
Nowô je téż softwôra do dôwaniô wiedzë ò zaktualnieniach, załamaniach sã softwôrë ë mùszebnotë zrëszeniô systemë pò ji zaktualnieniu.
Króm tegò òstałë wszëtcze wôżné nôrzãdza Kubuntu zintegrowóné z KDE 4, abò przeniosłé do PyKDE4, przez co brëkòwnosc nowi wersëji Kubuntu 8.10 nie zatracëła sã.

Kaszëbsczi jãzëk

W tim wëdôwkù mómë ju baro prosti wëbiérk kaszëbsczégò jãzëka. Sygô przeńc do: Menu KDE > Systemòwi ùstôw > Kraj/dzél kraju ë jãzëk , tam wcësnąc knąpã Install new Language ë wëbrac zwëczajno kaszëbsczi z zestôwkù jãzëków.

Kaszëbsczi jãzëk pò winstalowaniu

Zladënk

Zladowac nowi wëdôwk Kubuntu mòże prosto ze starnë:

http://www.kubuntu.org/getkubuntu/download

Mandriva Linux 2009

Mark — Sat, 11 Oct 2008 10:56:33 +0000

Mandriva Linux 2009 je jedną z tich nowich wëdôwków linuksowich distribùcëjów z jaczich na jeséń dostóniemë jesz czile – wëdôwanié znowionëch paczétów co 6 ksãżëców przëjało wiele distribùcëjów, co do tegò doprowôdzô.
Wedle Mandrivë mómë bënë, króm klasykòwich zaktualnieniów ë nowich czérowników, czile nowinów, w tim m.jin. sztartowanié systemë mô bëc terô chùtszé, mómë miec lepszé wspiarcé dlô notebooków, a Splashy zastąpił bootsplash (jidze tuwò ò systemã do wëskrzenianiô graficzi przë sztarce).

Dlô lubòtników kaszëbsczégò jãzëka w Linukse dobrą nowiną je gwës pòkôzanié tegò w kùńcu téż w ti distribùcëji – wëdôwk z KDE. Mandriva je gwës slédną z tich “wiôldżich” distribùcëjów w jaczi kaszëbizna nalôzła swój plac – kaszëbskô kalwiatura nalazła sã tam ju rëchli.

Darmôk Mandriva Linux 2009 mòże zladowac jakno wëdôwczi One (live CD z mòżnotą instalacëji) ë Free (fùl wersëjô DVD) z graficznëm òkrãżã KDE ë GNOME. Króm tegò mómë w Mandrivie téż kòmercjowi wëdôwk »Powerpack«, jaczi mòże za dëtczi zamówic, ablo téż kąsk tóni zladowac ze starnów.

Starna zladënkù:

http://www.mandriva.com/en/download.html