Kaszëbsczi Linux ë Ôpen Ùdbë : linuxcsb.org » Systemë

OpenSolaris – Sztetëno 2008

Mark — Sat, 18 Oct 2008 17:19:48 +0000

24 ë 25 rujana w Sztetënie bãdze mia swój plac kònferencëjô OpenSolaris. Ji òrganizatorama je Sun ë brëkòwnicë OpenSolaris, jaczi mają sobie za cél pòstôwioné pòpùlarizacëjã mòżnotë brëkùnkù ti systemë.

Nowi OpenSolaris mô pòdle òrganizatorów zamëkac w se wiele nowinów m.ji. w dzélach bezpiekù, startë pòdôwków czë kòntrolë przistãpù.

Kònferencëjô bãdze prowôdzonô przez sprôwników systemë OpenSolaris ë inżiniérów z Sun, z małima wëjimkama (n.p. Open High Availability Clusters), w anielsczim jãzëkù. Wéńdzenié je za darmôka, inetresownicë mùszą sã równak wprzódk zaregistrowac, a ò spanié ë jadło trza sómemù zadbac.

Rôczimë so Sztetëna do zalë Anne Jagielónczi w pałacë Pòmòrsczich Ksyżëców przë sztr. Kòrsarzë 34

Wicy wëdowiédzë na: conference.opensolaris.com.pl
Wëdowiédzô ò OpenSolaris w pòlsczim jãzëkù: pl.opensolaris.org

Ulteo – Linux w przezérnikù

Michôł — Tue, 20 May 2008 08:31:50 +0000

Linux na desktopie ni ma jesz wielu brëkòwników – to prôwda. Dzélk lëdzy ni mô taczé wiedzë, żebë zainstalowac nã systemã, czë nawetka zrëszec ją live z platczi CD czë DVD. Terô sprôwdzec co to je nen Linux ë jak to wszëtkò wëzdrzi mòżeta nie zmieniwając swòji systemë (!) dzãka Ulteo.

Ulteo to miono nowi òperacjowi systemë, òpiarti na Kubuntu a ùsôdzony bez ex-robòtnika Mandrivë, Gaëla Duvala. Domëslnym pùltã je KDE razã z zestôwkã aktualnëch aplikacëjów dlô tegò òkrãżégò. Wëzdrzi czësto jak kòżda jina distribùcëja Linuksa, le je jedno ale… ale dzejô w jinternetowim przezérnikù z wtëkôczã Javë. Òkróm tegò mòże téż zainstalowac nã systemã prosto na domôcym kòmpùtrze, téj nie mdze nót łączëc sã wiedno z jinternetã, bë ceszëc sã ze swòjégò Linuksa. Brëkòwnikóm Windowsa zabédowac mòże téż specjalną wersëjã Ulteo z jądrã systemù òpiartim ò coLinux, chtërna ùmòżebnia brëkòwanié dwóch systemów w jednym czasu! Sygnie le w Windowse zainstalowac Ulteo Virtual Desktop.

Do zrëszeniô systemë w przezérnikù nót je wprzód założëc kònto brëkòwnika na starnie ùdbë. Systema je przëstãpnô le w czilu jãzëkach, ni ma ji pò kaszëbskù. Pòlsczégò téż ni ma w przezérnikòwi systemë, ale ju Ulteo Virtual Desktop taką jãzëkòwą wersëjã dôwô. Z programów mòżemë brëkòwac Amaroka, GIMP, Gwenview, OpenOffice 2.3, Scribus, Skype ë jesz wiele jinszëch do edukacëji, mùltimediów, jinternetu (je nawetka przezérnik!), biurowi robòtë ëtd.

ShipIt!

Michôł — Fri, 18 Apr 2008 15:30:22 +0000

Mòże ju zamówic nowé wersëje pòpùlarnëch distribùcëjów Linuksa z rodzëznë Ubuntu. Platczi z Ubuntu, Ubuntu Server a téż Kubuntu z wersëją 8.04 LTS (òd Long Time Support – długòcządowé wspiarcé) zwóną téż Hardy Heron bãdą wësëłóné czilenôsce dniów pò premierze, chtërna je zabédowónô na 24 łżëkwiata.

Wiedno mòże téż zladowac a samemù wëpalic platkã z nowim systemã – na gwës mdze to wiele chùdzy jak żdónié na paczét. Dobrim wińdzenim je zôs aktualizacëjô do nowi wersëji brëkùjąc systemë aktualizacëji bënë swòji distribùcëji Ubuntu. Zainteresowónëch jak to zrobic òdsélómë do artiklów w najim serwisu a na gwës téż nie òstawimë bez òdpòwiescë problemów na jaczé mòże trafic brëkòwnik Linuksa.

Darmôk platczi mòże zamówic pòd adresama: shipit.ubuntu.com i shipit.kubuntu.org. Xubuntu a Gobuntu nie są przëstãpné w ramach akcëji ShipIt.

NVIDIA dlô Linuksa, Solarisa ë FreeBSD

Michôł — Sun, 27 Jan 2008 18:25:17 +0000

Wëdónô òsta nowô, òficjalnô wersëjô czérowników nVIDIA dlô Linuksa, Solarisa a FreeBSD. Dlô ti pierszi systemë przëstãpné są wersëje na platfòrmã x86 ë x86-64.

Czérowniczi ne dôwają wspiarcé prakticzno dlô wszëtczich mòdelów grafikòwich kartów, nawetka dlô tëch nônowszich. Nen wëdôwk ùprawiô fele w dzejanim wentilatora GPU na maksymalny chùtkòsce, rëmô problemë, chtërne ùdostôwałë ùpadniãca serwerë X, pòprawiô wespółrobòtã z laptopama, a téż zlepszô sprôwianié wëskrzëniwanim na ùrzãdzeniach HP Compaq.

Czérowniczi mòże zladowac z:

NVIDIA-Linux-x86-169.09 (16.7 MB, IA32),
NVIDIA-Linux-x86_64-169.09 (15.0 MB, AMD64/EM64T),
NVIDIA-FreeBSD-x86-169.07 (13.4 MB, FreeBSD x86),
NVIDIA-Solaris-x86-169.09 (16.1 MB, Solaris x64/x86).

FreeBSD 6.3

Mark — Sun, 20 Jan 2008 09:37:51 +0000

Bez mała rok pò wëdôwkù FreeBSD 6.2 ùprzistãpnilë rozwijôrze ti òperacjowi systemë (wòlny òdprowôdny Unixa) nôslédną ji sztabilną wersëjã 6.3. Zamëkô òna w se m.jin. zaktualnioné KDE 3.5.8, Gnome 2.20.1, Xorg 7.3, BIND 9.3.4 czë sendmail 8.14.2.

FreeBSD 6.3 mòże zladowac (bôczënk: je tegò 5 cedeczków) na platfòrmë Alpha, AMD64, i386, IA64, PC98 ë SPARC64. Co do zmianów ë pòprôwionëch felów, to czëtôjta wicy w swòji wersëji bënë Release notes.

Wersëjô 6.3 je ju sztabilną, a robòtë nad sztabilonotą wersëji FreeBSD 7.0 jesz derëją. Tã mómë narô le jakno RC1 do zladënkù, chòc mô sã òna nama ju, zgòdno z planã, w gromicznikù w pierszi swòji sztabilny wersëji pòkôzac.

Jednô ë drëgô (6.3 ë 7.0) zamëkôj ju w se kaszëbską klawiaturã, a FreeBSD je na gwës dobra alternatiwą dlô tich co nie chcą ùżëwac Linuksa.

Strana zladënkù: http://www.freebsd.org/where.html

Solaris ë Linux

Mark — Tue, 15 May 2007 17:40:36 +0000

Sun wësztartowôł nową ùdbã ò mionie Indiana, jakô mô doprowadzëc do kòmpatibilnotë Linuksa ë Solarisa. Jesz felëją akùratné pòdôwczi, klôr je le blós, że mô sã tim zajimac Ian Murdock, zakłôdôrz Debiana jaczi w strëmiannikù przeszed do Sun.

Mòże sã przedstôwic dobrze sparłącznié tich dwóch systemów, Solaris mô swòjé mòcne, a téż słabë starnë – jakno chòc drësznotã w brëkùnkù czë téż wspiarcé dlô hard-wôrë ë włączënié tich z wòlny soft-wôrë bë bëło gwës ze zwëskã dlô Solarisa.
Problemë są narô w różnëch licencëjach Linuksa ë Solarisa, në chòba, że Sun ùprzistãpni swòją òperacjową systemã jakno GNU General Public License, co bë bëło pò prôwdze czims òsoblëwim.

Wôrt mòże na tim placu jesz dodac, że òd 2005 rokù dzéjô przë Sun ùdba NexentaOS, jakô parłaczy jądro OpenSolarisa z Ubuntu.

EyeOS

Michôł — Mon, 01 Jan 2007 17:35:03 +0000

Wcyg żdając na GoogleOS, czëlë òperacjową systemã dlô ròbòtë w sécë, mòże òbezdrzëc richtich czekawi projekt, jaczim na gwës je EyeOS. Je to jesz nie fùlwôrtna òperacjowô systema, chtërną òtmëkô sã w przezérnikù z pluginsã Flash. W ni mómë przistãp do różnëch aplikacëji, w tim grë, editora tekstu, kalkùlator, przezérnik ë jesz wiele wicy.

Jakò, że je to ôpenzdrojowi projekt, mòże zladowac zdroje a ùsôdzëc gò na swòji serwerze. Nót do tegò miec serwerë z Apache ë PHP (chòc na windowsowëch serwerach téż jidze to zrobic). Chto niechc robic tegò ù se, abò nie mô przistãpù do taczégò serwera, mòże wëpróbòwac wersëji demo abò darmôk zaregisterowac sã ë òbaczëc jakno to wszëtkò wëzdrzi.

Minusã je na gwës felënk kaszëbskòjãzëkòwi wersëji, leno to je zwëkòwô sprawa dlô wnetka wszëtczéch kòmpùtrowëch programów. Pòlskô wersëja nie je jesz do kùńca zrobionô, téj nót je chòc kąsk znac anielsczi abò miemiecczi jãzëk.

Nowô menadżera paczétów w Reactose

Michôł — Sun, 10 Dec 2006 23:10:19 +0000

Reactos – wòlnô implementacëja systemów windowsowëch wcyg żdże na menadżerã paczétów. Jeden z deweloperów Reactosa, Maarten Bosma zabédowôł nowi wëzdrzatk ti nótny programë ë w swòjim blogù pisze, że wnetka nacznié ji kòdowanié. To, że takô menadżera barô pòmògô w codniowi robòce z systemã ë programama wiedzą wszëtcë brëkòwnicë linuksowëch distribùcëji.
Sóm Reactos nie je jesz parôt do codniowi robòtë ë nie je fùlwôrtnã systemą a chòc ùdba je 10 lat stôrô, to ji numer za wësoczi nie je (0.3.0) ë wiele w ni zrobic nie mòże. Równak ùdba je dosc tëli zajimnô ë wôrt tegò bë wiédzëc ò ni kąsk wicy.