Tak bëło téż w tã jeséń – w slédnych tidzéniach pòkôzałë sã distribùcëje:

• Ubuntu 9.10
  ë kòl ni té:
  • Kubuntu 9.10
  • ë Xubuntu 9.10
• openSUSE 11.2
• Fedora 12

Kòżdô z nich niese ze sobą zaktualnioną softwôrã, nowé jądra Linuksa ë generalno to mniszé czë wikszé zmianë na lepszé ë to tak, że tak pò prôwdzë to kòżdi mòże nalezc, westrzód nich,  pasowną distribùcëjã dlô se.  Instalacëjô kòżdi z wëżi namieniónych je zblëżono letkô ë nawetka ti, co nié mają zebrónegò wiôldżegò doswiadczeniô w ni, bãdą w sztãdze sã z nią pòradzëc.

Instalownik Firefoksa w Kubuntu 9.10

Przez to, że dolmaczimë na kaszëbsczi KDE ë tipiczné distribùcjowé dzéle prosto przë Kubuntu chcemë le zamòdlëc tã distribùcëjã dlô tich, co chcą nastôwic w Linukse kaszëbsczi jãżëk, bë ji prawie brëkòwôlë, przez to że je òna nôbarzi skaszëbionô.

Òstôwając przë Kubuntu, to nie wiémë jak wama, le nama wiédno gwës felowało to, że pò instalacëji nie dało bënë zarô przezérnika Firefox. Terô téż gò jesz nie dô chòc je ju lżi gò doinstalowac, a to dzãka môłi aplikacëji (téż pò kaszëbskù) jaką mòże nalezc w internetowim dzélu menu KDE.

Òd wersëji 11.1 mómë bënë klôrowné rozdzélenié wòlny ë swòji Softwôrë. OpenSuse-DVD zamëkô w se òd terô blós wòlno przëstãpną softwôrã; jinszé paczétë (kòdeczi,nié OSS softwôrã ëtp) je nót zladowac z sécë, abò zladowac ze starnów ùdbë OpenSuse dodôwną Non-OSS-CD jakô wiele z nich w se zamëkô. Tim rozdzéleniém chcą rozwijôrzë ti ùdbë zletczëc dôlszé roskòscërzanié ti distribùcëji – z mëszlą ò spòdlowi wersëji dlô jinszëch programistów, jaczi bë chcelë na ni bùdowac swòje distribùcëje (jak to fùnkcjonëje mòże ùzdrzëc w przëtrôfkù Debiana czë na nim òpiartegò Ubuntu). Równoczasno zlëtczonô òsta, w przërównaniu do rëchli, w nowim wëdôwkù instalacëjô dodôwny softwôrë jakno n.p. kòdeków mp3 czë grôcza flasha.

Do wëbiérkù pùltów mómë sztandardowò ju KDE w wersëji 4.1.3 (wersëjô 3.5.10 je zeszłô do òptacëji “jinszé pùltë”, co òznôczô blós, że KDE 4.x stało sã ju dosc szlabilnëm pùltã dlô rozwijôrz OpenSuse) ë Gnome 2.24.1. Czile mòdułów Yasta (w tim particjonowanié czë instalacëjô drëkerów) òstałë przerobioné.

OpenSuse jakno distribùcëjô z cëskã na KDE je na gwës dobrim wëbiérkã dlô lubòtników Linuksa. Bënë mómë téż dali mòżnotã wëbiérkù kaszëbsczi jãzëkòwi wersëji, chòc nie je òna tak fùl skaszëbionô jakno w Kubuntu.

OpenSuse 11.1 mòże zladowac jakno DVD ë live CD (z mòżnotą instalacëji) dlô systemów x86-, x64- ë PowerPC ze starnë: http://software.opensuse.org/

Samô systema pò winstalowaniô sztartëje chùtkò, a pòprôwioné fele w instalownikù paczétów dałë mòżnotã na to bë chùtczi doinstalowac nowé programë jakno to bëło rëchli.

OpenSuse 11 mòże òd 19. czerwińca zladowac ze starów ùdbë na 32- ë 64-bitowé jakno ë na PowerPC platfòrmë. Do wébiérkù stoją abò jednô wersëjô na DVD, abò dwie live CD z KDE 4 ë GNOME.

Ùdba OpenSuse pòcësna ùprzëstãpnianié całi distribùcëji na CD, co trzëmóm za lëché rozwiązanié w przëtrôfkù stôszëch kòmpùtrów. Jeżlë ju redukùjëmë òbrôzë zladënkù to bëło bë fejn dac téż live CD z òkrãżã XFCE do zladënkù, bò to prawie je nót tima co bë chcelë zrëszëc tã distribùcëjã na stôrszëch kòmpùtrach, a tak to mòżemë jã le wgrac z całi DVD  (jeżlë mô chto taczi nëk – jô móm, le ten jakno dosc stôri nie dôł sã radë z tim wiôldżim òbrôzã), abò wgriwając wprzód wersëjã z GNOME czë KDE ë dograc XFCE, rëmając przë tim te pierszé – wëchôdô równak z tegò lëchô skrojóné òkrãżé. Całownosc (le trzë mòżnotë zladënków) doprowadzëła do tegò, że ùdba OpenSuse pisze bùszno ò tim, że zrosła jima całownô wielëna zladënkù miarë lopków – ne jo, na nen ôrt (wëmùszanié) mòże na drëdżi rôz dac le jeden òbrôz ë to le blós DVD do zladënkù, to bãdze jesz “lepi” .

Generalno pò krótczim testowaniém OpenSuse 11 mògã rzec, że je to fejn zrëchtowónô distribùcejô, jakô czérëje sã doch na nowszé kòmpùtrë. Instalacëjô jidze na tich flot, a samô systema aktualizëje sã lepi jakno to bëło przódë, chòc derëje to ë tak w przërównaiém do Debiana dłużi.

Zladënk òbrôzów: http://software.opensuse.org/

OpenSuse-Projekt

Pùblikacëjô kùńcowi wersëji OpenSuse 10.3 mô miec dali swój plac 4. rujana 2007. Gnome 2.20 jaczé mô sã pòkôzac 19. séwnika mô sã jesz dostac do nowégò OpenSuse, a bez to, że KDE 4.0 mô sã ùkôzac dopiérze na gòdë to tegò òkrãża gwës jesz nié nalezémë bënë, a barżi jegò dzéle.

Czëtôjta wicy na starnach ùdbë.

Czëtając òpisënczi ti systemë nie nalezemë henë niżódny rewòlucëji. Nie mdze ju systemù lopków ReiserFS, a w jegò môl mdze ext3; zwikszonô òstanié wersëjô przezérnika Firefox do 2.0; zlepszonô òstanié menadżera sprôwiania paczétama ë òbłëżnota czëtników kôrtów SD. Nowi wersëje mdã téż mielë brëkòwnicë GNOME (wersëjô 2.16.1), KDE (wersëjô 3.5.5), OpenOffice (2.0.4), Koffice (1.6) a wiele jinszëch programów. Co wôżne, nowô je téż wersëja xorg (terô 7.2) w jaczi je ju kaszëbskô klawiatura, dzãka temù, jak narô na distribùcëja je jedyną, co ùmòżebnia brëkòwanié kaszëbsczi klawiaturë zarôzkù pò instalcëji. Zwikszoné je wspiarcë dlô pòsobnëch kòmpùtrowëch ùrzãdzeniów a w YaST2 są nowi mòdule (sudo, klient iSCSI ëtp).

Przed swiãtama mòże spòdzôc sã pùdełkòwi wersëji, co mòże nie je jaż tak dobrim wiadłã, bò jesz òstało wiele felów do pòprawków. Lëdzë z openSUSE lëdają trzëmac terminë, nawetka kòsztã niepòprawionëch jesz felów.

Zdrój:

http://suse.ehelp.pl/modules/news/article.php?storyid=815

http://lists.opensuse.org/opensuse-announce/2006-12/msg00004.html