Kaszëbsczi Linux ë Ôpen Ùdbë : linuxcsb.org

Pùnktualno z terminã realizacëji pòkôza sã nowô wersëjô 9.04 (Jaunty Jackalope) pòpùlarny linuksowi distribùcëji Ubuntu. Do zladënkù stoją òbrôzë CD/DVD dlô desktopów ë serwerów z 32 ë 64 bitowima procesorama z architekturą x-86, jakno ë wersëjô Ubuntu 9.04 Netbook Remix na pamiãc USB dlô Netbooków.

Bënë nowégò wëdôwkù mómë m.jin. : nowé jądro (2.6.28.11), X-Server w nowim wëdôwkù 1.6.0, zaktualnioną softwôrã.

Ubuntu zamëkôw se graficzné òkrãżé GNOME 2.26.1, a Kubuntu KDE 4.2.2. Przë tim slédnym wôrt je dodac, że mómë w nim kaszëbską wersëjã KDE jakô je lepszegò kwalitetu jakno rëchliszé wëdôwczi. Króm tegò mają rozwijôrze Ubuntu dorobioné startowanié systemë tak, że skrodzëł sã nama czas startowaniô ò kòl 30%. Familëjô Ubuntu wspiérô téż terô nową systemã lopków Ext4, chtërnô stoi do wëbiérkù króm standardowi jesz u Ubuntu Ext3.

Òbrôzë platków mòże zladowac darmôk z:

• Kubuntu: http://www.kubuntu.org/getkubuntu
• Ubuntu: http://www.ubuntu.com/getubuntu/

abò téż zamówic darmôk CD z negò placu:

• Kubuntu: https://shipit.kubuntu.org/
• Ubuntu: https://shipit.ubuntu.com/

Debian GNU/Linux 5.0 bëł zapòwiadóny na wczora, wzérając równak na wnet dwa lata robòtë nad nowim wëdôwkã ti distribùcëji nie je to doch straszné spòzdnienié.

Lubòtnicë Debiana bãdą na gwës z niegò rad. Mómë do zladënkù distribùcëjã dlô wielu wszelejaczich architekturów, jakô zamëkô w se stabilny ë zaktualniony zestôwk softwôrë (jądro 2.6.26, X.org 7.3, Gnome 2.22).  Z nowinów, jak na Debiana, mómë graficznegò instalownika, z jaczim mòże lżi winstalowac tã distribùcëjã, chòc ni mómë w nim wicy mòżnotów jakno w tribie tekstowim.

(wicy…)

Czëtając titel negò wiadła mòże pòmëszlëc, że firma z Redmond nacza wzérac pòwôżno na ôpenzdrojowé ùdbë ë w dzélu téż tak gwës je. W ògłosënkù jaczi mòże przeczëtac na starnach LinkedIn ,  Microsoft szëkô za wzmòcnieniém Competive Strategy Team, w jaczim to nowi szef mô pòmôgac nalezc dobré stegnë w òbeńscu sã z kònkùrencëją z Open Source -  nie òznôczô to, że gôdóné je ò stategiji dlô wspieraniu Open-Source. Nimò tegò je w tim widzec, że Microsoft wzérô doch na ôpenzrojowé pùltowé ùdbë jakno na zagrożenié ë mô starã ò to, bë nie dac sã zaskòczëc.

Pisanié rówank terô ò pòwôżnym zagrożeniu dlô firmë z Redmond, jakô doch dominëjë w pùltowich rozwiązanich na swiece, bëłobë mijającé sã z prôwdą. Prôwdą je równak to, że pòpùlarnota wòlnëch pùltów zwikszëła sã, stałë sã òne téż baro drëszné dlô brëkòwników ë jeżlë jesz 10 lat nazôd Microsoft nie widzôł w ti zagrożenió, to terô ju wzérô na to kąsk jinaczi.

Karno KDE wëdało 27 stëcznika nową wersëjã wòlnegò graficznegò òkrãżô KDE 4.2 ò kòdowim mionie “Answer” (csb.:Òdpòwiesc”).

Nowô wersëjô, króm zaktualnieniów ë pòprôwków, òsta ju tak rozbùdowônô bë bëła atrakcjowô dlô wnet wszëtczich brëkòwników, co jesz ò rëchliszi wersëji nie szło do kùńca rzec. Szerszé wiadło ò nowinach w KDE 4.2 mòże przeczëtac na starnch ùdbë, m.jin. w pòlsczim jãzëkù na starnie kde.org.pl.

Dzãka naji robòce nad dolmaczënkama, kaszëbskô wersëjô je dali przëstãpnô w sztabilnym òficlanëm wëdôwkù – mómë nôdzejã, że mô òna nalazłé ë gwës téż nalezé swòjcih brëkòwników.

Nvidia òprzëstãpniła nowi czerownik dlô graficznych kôrtów wersëjô 180.22 dlô uniksowich kòmpùtrów (Linux, FreeBSD ë OpenSolaris) z achtitekturą x32 ë x64. Do nowinów jaczé dô bënë przënôléżi m.jin. wspiarcé dlô CUDA 2.1 (Compute Unified Device Architecture) co dôwô mòżnotã òdłożeniô rëchòwny mòcë do GPU ë pierszé włączenié nowégò graficznegò standardu OpenGL 3.

Mómë téż wikszé wspiarce dlô nowich graficznëch kôrtów.

Krótkò przed Gòdama rozwijôrze Linuksa OpenSuse ùprzëstãpnilë nama do zladënkù nową wersëjã 11.1 . Króm tipicznëch zaktualnieniów softwôrë je nót tuwò napisac ò zmianie pòzdrzatkù na nôslédné wëdôwczi.

Òd wersëji 11.1 mómë bënë klôrowné rozdzélenié wòlny ë swòji Softwôrë. OpenSuse-DVD zamëkô w se òd terô blós wòlno przëstãpną softwôrã; jinszé paczétë (kòdeczi,nié OSS softwôrã ëtp) je nót zladowac z sécë, abò zladowac ze starnów ùdbë OpenSuse dodôwną Non-OSS-CD jakô wiele z nich w se zamëkô. Tim rozdzéleniém chcą rozwijôrzë ti ùdbë zletczëc dôlszé roskòscërzanié ti distribùcëji – z mëszlą ò spòdlowi wersëji dlô jinszëch programistów, jaczi bë chcelë na ni bùdowac swòje distribùcëje (jak to fùnkcjonëje mòże ùzdrzëc w przëtrôfkù Debiana czë na nim òpiartegò Ubuntu). Równoczasno zlëtczonô òsta, w przërównaniu do rëchli, w nowim wëdôwkù instalacëjô dodôwny softwôrë jakno n.p. kòdeków mp3 czë grôcza flasha.

(wicy…)

Trzëgardowé Karno Brëkòwników Linuksa (TLUG) chce zòrganizowac ju czwiôrti rôz w pòsobnicë w Pùckù, w HOM, Linuksowé Zëmòwiskò.

Kòszta za dwie noce (jizba z łazenka, fùl wëżëwienié ë ekstra dodôwczi) mają leżëc kòl 160 złotëch. Chãtni mògą òbôczëc co bëło lós na ùszłëch zëmòwiskach na starnie: zimowisko.linux.gda.pl.

To, czë bãdze òno miało plac czë téż nié, zanôleżi w wiôldżim dzélu òd waji, je nót czëkawich wëstapiéniów ë warkòwniów. Trzëgardowi LUG zachãcô do aktiwny wespółrobòtë w òrganizacëji linuksowégò zëmòwiska ë pòdôwaniô swòjich propòzycëjów wëstãpieniów.

(wicy…)

Ubuntu/Kubuntu/Xubuntu to trzë wersëje z różnëma graficznëma òkrãżama, jaczé òstałë slédno òpùblikòwóné w swòji nowi wersëji 8.10. Nôwikszé widzawné zjinaczi mòże òbaczëc w wëdôwkù z KDE (Kubuntu), dze ju sztandardowò mómë wersëjã pùltu 4.x tegò òkrãzô – na tim téż są tuwò skòncentrëjemë.

Nowé òkrãżé KDE 4.1.2 niese ze sobą, w przërównaniu do 3.5.9, wiele zmianów. W dzélu równak mómë part znónëch nama rëchli fùnkcëjów, jaczé jesz nie są przistãpny w KDE 4.1 – brëkòwnicë co nie chcą tich starcëc, niech òstaną narô jesz przë KDE 3.5.x ë z Kubuntu 8.04 Hardy Heron, nen wëdôwk je dali wspiéróny. Proszëmë przeczëtac na starnach kde.org articzel “Is KDE 4.1 for you?” (”Je KDE 4.1. dlô ce?”) bë sã ùgwësnic, czë ju je wôrt wama przeńc na nowé òkrãżé. Pòmòc w migracëji z KDE 3 na KDE 4 nalezeta na starnach wiki.kubuntu.org .

(wicy…)

24 ë 25 rujana w Sztetënie bãdze mia swój plac kònferencëjô OpenSolaris. Ji òrganizatorama je Sun ë brëkòwnicë  OpenSolaris, jaczi mają sobie za cél pòstôwioné pòpùlarizacëjã mòżnotë brëkùnkù ti systemë.

Nowi OpenSolaris mô pòdle òrganizatorów zamëkac w se wiele nowinów m.ji. w dzélach bezpiekù, startë pòdôwków czë kòntrolë przistãpù.

Kònferencëjô bãdze prowôdzonô przez sprôwników systemë OpenSolaris ë inżiniérów z Sun, z małima wëjimkama (n.p. Open High Availability Clusters), w anielsczim jãzëkù. Wéńdzenié je za darmôka, inetresownicë mùszą sã równak wprzódk zaregistrowac, a ò spanié ë jadło trza sómemù zadbac.

Rôczimë so Sztetëna do zalë Anne Jagielónczi w pałacë Pòmòrsczich Ksyżëców przë sztr. Kòrsarzë 34

• Wicy wëdowiédzë na: conference.opensolaris.com.pl
• Wëdowiédzô ò OpenSolaris w pòlsczim jãzëkù: pl.opensolaris.org

Mandriva Linux 2009 je jedną z tich nowich wëdôwków linuksowich distribùcëjów z jaczich na jeséń dostóniemë jesz czile – wëdôwanié znowionëch paczétów co 6 ksãżëców przëjało wiele distribùcëjów, co do tegò doprowôdzô.
Wedle Mandrivë mómë bënë, króm klasykòwich zaktualnieniów ë nowich czérowników, czile nowinów, w tim m.jin. sztartowanié systemë mô bëc terô chùtszé, mómë miec lepszé wspiarcé dlô notebooków, a Splashy zastąpił bootsplash (jidze tuwò  ò systemã do wëskrzenianiô graficzi przë sztarce).

Dlô lubòtników kaszëbsczégò jãzëka w Linukse dobrą nowiną je gwës pòkôzanié tegò w kùńcu téż w ti distribùcëji – wëdôwk z KDE. Mandriva je gwës slédną z tich “wiôldżich” distribùcëjów w jaczi kaszëbizna nalôzła swój plac – kaszëbskô kalwiatura nalazła sã tam ju rëchli.

(wicy…)