Kaszëbsczi Linux ë Ôpen Ùdbë : linuxcsb.org

To ju je 15 lat, jak 16. zélnika 1993 Ian Murdock wësztartowôł ùdbã Debian. Jegò zgrôwą bëło ùsôdzenié linuksowi distribùcëji jakô bë le wòlną softwôrã w se zamëka ë nad jaka kòżdi robic bë móg. W midzëczasu robi nad Debian GNU/Linuksã kòl 2000 dobrowólnëch rozwijôrzów, a samô distribùcëjô dożda sã miona mòcny ë sztabilny systemë, jakô je téż spòdlã dlô wielu jinszëch distribùcëjów jakno n.p. Ubuntu czë Knoppix. Nônowszô wersëjô Debiana 5.0 (”Lenny”) pòkôże sã nama na zôczątkù séwnika.

W ùszłëch tidzeniach wëszłô je nowô wersëjô distribùcëji OpenSuse - OpenSuse 11. Mómë w ni, w spòdlowim wëdôwkù, Gnome 2.22, KDE 3.5.9 ë 4.04, X.org 7.3, jądro w wersëji 2.6.25.5, a całownô softwôra zamkłô w distribùcëji òsta zaktualionô. Nowé jądro dôwô lepszą mòżnotã wirtualizacëji ë wspiarcô dlô hardwôrë. Instalownik òstôł òdswierzony ë wëzdrzi w przërówmnaiém do wersëji 10.3 na gwës lepi, dôwô równak téż króm tegò mòżnotã doparłãczeniô przë instalacëji swòjëch òbrôzów karnów softwôrë na placu pòjedińczëch paczétów, co schùtcziwô instalacëjã, bò òbrôzë wszëtczich paczétów z jednegò karna sparłączoné są w jednim archiwùm.

Samô systema pò winstalowaniô sztartëje chùtkò, a pòprôwioné fele w instalownikù paczétów dałë mòżnotã na to bë chùtczi doinstalowac nowé programë jakno to bëło rëchli.
(wicy…)

Ôpen zdrojowé ùdbë to nie blós programë, systemë ë kòdowanié - sztótama czas je téż na rozegracëjã, téż “òtemkłą”. Bëlnym tegò przëtrôfkã je krótczi, animòwóny film ò jaczim przódë ju mómë pisóné. Czile dni dowslôdë miał wëszłi na DVD film Big Buck Bunny a ju terô mòżemë gò zladowac! Film je przëstãpny w wielu fòrmatach (MP4, OGG, H.264, MSMP4), dzãka czemù dzejôł mdze wszelejaczich òdgrëwôczach. Film je téż do òbezdrzëniô w serwisach Youtube ë Vimeo.

Ôpen zdrojowi film òznôczô ni mni ni wicy jak to, że mómë téż przëstãp do zdrojów. Dlôtë aùtorowie mają przërëchtowóné téż do zladënkù robòczé lopczi: scenë, mòdele sztaturów czë òbiektów, teksturë, skriptë ëtd. Mést dlô tëch co rozmieją robic z 3D grafiką to czekawô deja, bò ùmòżebniô wëzwëskanié tegò wszëtczégò ù se. (wicy…)

Mozilla wòłô do bicô rekòrdu swiata w nôczãszczi zladowóny softwôrë òb 24 gòdzënë. Softwôrã  jaką ma nen rekòrd bëc ùstanowióny je nowi Firefox 3.

Jeżlë wszëtkò dobrze póńdze, to wielëna zladënków òstónié dodónô do Knédżi Guinnessa. Czédë òstónié òddóny nowi Firefox 3 do wòlnegò zladënka jesz nie stoi feste, nimò tegò fanowie Firefoksa mògą sã zeregistrowac na stranie Spreadfirefox.com, bë w dzéń ùwòlnieniô nowi wersëji dostac e-maila z pòwiadomieniém ò tim.

Òbczas pisaniô tegò wiadła mô sã ju wicy jakno 320 tësãców chãtnéch zaregistrowónëch.

Karno linuxcsb.org rôczi naszich czëtińców bratëczno do wespólny zôbawë w bice rekòrdu swiata!

Registrëjeta sã na starnach spreadfirefox.com

26 maja wëstartowóné mô Szląskô Wikipedia, co sparłączoné je z przëznanim szląsczi mòwie kòdu ISO 693-3 (szl). Jak narô dérô przenoszenié artiklów z inkùbatora, téj do czasu zakùńczeniô mòże jesz nalezc drobné techniczné felë. Na przédny starnié mòże nalézc m.jin. lënczi do artiklów pòswiãcónëch szląsczi gôdce czë zasadów pisënkù.

Próbë ùsôdzeniô ti jãzëkòwi wersëji dérałë ju wicy jak 2 lata. Pòmòcnô bëła bëlna robòta wiôldżégò karna aktiwnëch szląskich wikipedistów, chtërni pòswiãcôlë swój czas na editowanié artiklów w inkùbatorze.

Linux na desktopie ni ma jesz wielu brëkòwników - to prôwda. Dzélk lëdzy ni mô taczé wiedzë, żebë zainstalowac nã systemã, czë nawetka zrëszec ją live z platczi CD czë DVD. Terô sprôwdzec co to je nen Linux ë jak to wszëtkò wëzdrzi mòżeta nie zmieniwając swòji systemë (!) dzãka Ulteo.

(wicy…)

Czile dni nazôd pòkôza sã nama nowô wersëjô distribùcëji Fedora: Fedora 9.
Mómë żdóné z wiadłã ò tim do ùsôdzeniô artikla ò tim jak mòże ju nastôwic w Fedorze kaszëbsczi jãzëk w òkrãżu KDE 4.x.

(wicy…)

Mómë dlô waji dodóny artikel ò tim jak nastôwic kaszëbsczi jãzëk w Debianie Lenny z òkrãżã KDE.

Je to nôslédny przëmiôr na to, że naju robòta przë KDE je widzałô w corôz wicy distribùcëjów, a nié le blós w Kubuntu - co mòże pòmëszlëc czëtając wpisënczi na najich starnach .

Dzél pòmòcë do Linuksa bãdzemë pòmalińkù dofùlowiwac przidatnëma artiklama ë to nié le blós ò kaszëbsczich wersëjach. Jeżlë môta pëtania, czë téż pòmëslënczi na przëdatné artikle, to proszëmë te sélac do naju ze starnë łaczbë.

Czëtôjta: Kaszëbsczi jãzëk w Debian Lenny

Wkrôdła sã nama w kaszëbsczim dolmaczënkù Kubuntu widzałô zarô pò òtemkniãcô menu fela - ti co mają winstalowóną kaszëbską wersëjã na gwës ju dozdrzelë, że mómë czile tërerów na zôczątkù słowa “zjadłé” - jaką mòże równak kòżdi baro letkò sóm pòprawic.

1. Biéjta w menu do réżczi “mòwi nastôw”, a tam klëknijta prawą knapą mëszë na ten element
   
2. Wëbierzta z menu - jaczé wama terô wëskòknie - “Editëjë element”
   

(wicy…)

W Ubuntu 8.04 LTS “Hardy Heron” (wëszłé 24. łżëwkiôta) je kładłi, jakno ju rëchli w Ubuntu 6.06 LTS, wiôldżi cësk na sztabilnotã całi systemë. Stoi za tim baro dołdżé wspiarcë aktualizacëjama (3 lata dlô desktopów) tegò wëdôwka. Nié mòże gwës tuwò gôdac ò wiôldżim skòkù w bënowich zjinakach w przërówaniém do wersëji 7.10 - 6 ksãżëców to nie je znôwù tak wiele czasu bë wëszła z tegò zarô rwòlucëjô - nimò tegò mòżemë pisac ò czékawich nowich rozwiązaniach, taczim je na gwës instalownik z jaczim mòżemë terô winstalowac Ubuntu prosto z Windowsa bez mùszebnotë sztartowaniô kòmpùtra z CD czë téż mùszebnotë particjonizowaniô cwiardi platë. Nowò doszłô je téż czékawô programa wëpôlaniô platków ò mionie Brasero. Ubuntu 8.04 je téż pierszą distribùcëją jakô niese ze soba sztandardowò przezérnik Firefox w wersëji 3.
(wicy…)